Летописец духовной жизни Беларуси: газете «Культура» исполнилось 35 лет

Газета «Культура» ўжо больш за 35 гадоў застаецца галоўным летапісцам духоўнага жыцця Беларусі, упэўнена ўтрымліваючы статус ключавога грамадска-асветніцкага выдання. З гэтай нагоды ў Дзяржаўнай акадэміі музыкі прайшоў святочны канцэрт і ўрачыстая цырымонія ўшанавання супрацоўнікаў рэдакцыі. Віншавалі калектыў ганаровыя госці, у ліку якіх прадстаўнікі дзяржаўнай улады і грамадскіх аб’яднанняў, п іша sb.by.

З моманту выхаду першага нумара ў кастрычніку 1991 года гэтае выданне, якое ўваходзіць у склад установы «Культура і мастацтва», вядзе сумленны і глыбокі дыялог з чытачом пра гісторыю, мастацтва і нацыянальную спадчыну.

Першы намеснік міністра інфармацыі Дзяніс Езерскі накіраваў віншаванне ад міністра інфармацыі Дзмітрыя Жука і адзначыў, што газета мяняецца ў лепшы бок, яе прыемна трымаць у руках, гартаць і чытаць:

— Многім ведамасным выданням мы ставім вас у прыклад, паказваючы, як трэба працаваць. Вы аператыўна расказваеце пра тэматычныя навінкі, ствараеце змястоўныя праекты, асвятляеце культурнае жыццё краіны. Важна і тое, што выдатна адлюстроўваеце рэгіянальную тэматыку, паказваеце трывалыя эканамічныя вынікі. Газета знаходзіць свайго чытача.

Прывітальны адрас ад міністра культуры Марата Маркава перадаў першы намеснік міністра культуры Аляксандр Сідарэнка :

— Гэтая дата — не проста этап гісторыі выдання, гэта сведчанне яго аўтарытэту, запатрабаванасці і той адметнай ролі, якую культура адыгрывае ў інфармацыйнай прасторы нашай краіны , — гаворыцца ў прывітальным адрасе. — На працягу 35 гадоў вы застаецеся галоўным друкаваным голасам культурнага жыцця рэспублікі. На старонках газеты знаходзяць адлюстраванне самыя яркія падзеі, вядзецца аналіз мастацкіх набыткаў, уздымаюцца пытанні захавання гісторыка-культурнай спадчыны і развіцця творчай індустрыі. Вы забяспечваеце ўнікальную пляцоўку для зацікаўленага дыялогу паміж дзеячамі мастацтва, экспертамі і шырокай аўдыторыяй. Асабліва каштоўна, што за ўсім гэтым стаіць высокі прафесіяналізм работнікаў рэдакцыі.

Чатыры прэстыжныя статуэткі нацыянальнай прэміі «Залатая літара» — яркі доказ найвышэйшага прафесіяналізму рэдакцыі і безумоўнага прызнання з боку калег і аўдыторыі. У эпоху імклівых інфармацыйных змен «Культура» захоўвае вернасць традыцыям, смела фарміруе сучасную крос-медыйную прастору. Аб’ядноўваючы класічнае друкаванае слова, лічбавыя платформы і інтэрактыўныя праекты, газета даказвае: сапраўдная культура не ведае межаў і заўсёды сучасная.